कोल्हापूर : कोल्हापूर जिल्हा सहकारी दूध उत्पादक संघ अर्थात ‘गोकुळ निवडणूक’च्या पंचवार्षिक निवडणुकीसाठी महायुतीमधील जागावाटपाचा तिढा कमालीचा ताणला गेला आहे. एकूण २५ जागा असताना मित्रपक्षांच्या दाव्यांची बेरीज मात्र ३० च्या घरात पोहोचली आहे. त्यामुळे हा तिढा सोडवण्यासाठी महायुतीतील सर्व प्रमुख नेत्यांनी हा चेंडू आता थेट मुख्यमंत्री देवेंद्र फडणवीस यांच्या कोर्टात टोलवला आहे. पुढील दोन दिवसांत यावर अंतिम तोडगा निघण्याची शक्यता वर्तवली जात आहे.
गोकुळ निवडणूक : २५ जागा आणि ३० मागण्या; कोणाला किती जागा हव्यात?
महायुतीमध्ये कोल्हापुरात ‘मोठा भाऊ’ कोण ठरणार, यावरून भाजप आणि राष्ट्रवादी काँग्रेस (अजित पवार गट) यांच्यात जोरदार रस्सीखेच सुरू आहे. चारही घटक पक्षांनी अधिक जागांवर दावा ठोकल्याने पेच निर्माण झाला आहे:
- राष्ट्रवादी काँग्रेस (अजित पवार गट) : सर्वाधिक १० जागांची आग्रही मागणी.
- भारतीय जनता पक्ष (भाजप) : किमान ८ जागांवर ठाम दावा.
- शिवसेना (शिंदे गट) : ८ जागा मिळाव्यात असा आग्रह.
- जनसुराज्य शक्ती पक्ष (विनय कोरे गट) : आधीच्या २ ऐवजी ३ जागांची मागणी.
८ ऑक्टोबरची डेडलाईन; बंडखोरी रोखताना दमछाक होणार!
गोकुळ निवडणुकीतील उमेदवारी अर्ज मागे घेण्याची अंतिम मुदत ८ ऑक्टोबर आहे. आता केवळ ६ दिवसांचा अवधी शिल्लक राहिल्याने महायुतीच्या नेत्यांसमोर आव्हान उभे राहिले आहे.
जागावाटपावर अद्याप अधिकृत शिक्कामोर्तब न झाल्याने डमी व इच्छुक ठरावधारकांचे अर्ज मागे घेण्यासाठी मोठी धावपळ उडणार आहे. ज्या प्रमुख कार्यकर्त्यांना डावलले जाईल, त्यांची नाराजी दूर करणे आणि ऐनवेळी बंडखोरी थोपवणे महायुतीच्या स्थानिक नेतृत्वासाठी डोकेदुखी ठरत आहे.
Major Crackdown: Centre Bans 25 OTT Platforms Including ULLU and ALTBalaji Over Explicit Content | See Full List
मुंबईतील खलबतं; मुश्रीफ आणि कोरेंनी मांडले ठरावांचे गणित
जागावाटपाचा तिढा सोडवण्यासाठी मुंबईत मुख्यमंत्र्यांसोबत एक महत्त्वाची बैठक पार पडली. या बैठकीला वैद्यकीय शिक्षण मंत्री हसन मुश्रीफ, उच्च व तंत्रशिक्षण मंत्री चंद्रकांत पाटील, आरोग्य मंत्री प्रकाश आबिटकर, खासदार धनंजय महाडिक, आमदार विनय कोरे आणि माजी खासदार संजय मंडलिक उपस्थित होते.
या बैठकीत हसन मुश्रीफ आणि विनय कोरे यांनी मुख्यमंत्री देवेंद्र फडणवीस यांना गोकुळमधील स्थानिक ठराव, संस्थांचे जाळे आणि राजकीय वस्तुस्थितीचे गणित मांडून दाखवले. ठरावधारकांच्या संख्येनुसार राष्ट्रवादी काँग्रेसच या निवडणुकीत महायुतीचा ‘मोठा भाऊ’ ठरेल, अशी आकडेवारी फडणवीसांसमोर ठेवण्यात आल्याचे समजते.
ऐन निवडणुकीत फोडाफोडीच्या राजकारणाला वेग
जागावाटपाची चर्चा सुरू असतानाच दोन्ही आघाड्यांमध्ये फोडाफोडीचे राजकारण सुरू झाले आहे. गोकुळचे माजी संचालक सत्यजित पाटील यांनी आमदार सतेज पाटील यांच्या उपस्थितीत काँग्रेसमध्ये जाहीर प्रवेश केला. यामुळे विरोधी महाविकास आघाडीला मोठे बळ मिळाले आहे. तर दुसरीकडे, ए. वाय. पाटील यांनी अजित पवारांच्या राष्ट्रवादीत प्रवेश करून बेरजेचे राजकारण केले आहे. अर्ज माघारीची मुदत संपण्यापूर्वी कोल्हापूरच्या राजकारणात आणखी मोठे राजकीय भूकंप होण्याची दाट शक्यता वर्तवली जात आहे.
