संतोष देशमुख यांच्या हत्येचे भीषण वर्णन आतापर्यंत ऐकायला मिळत होते, जे ऐकून मन सुन्न होत होते आणि अंगावर काटा येत होता. मात्र, आता त्यांच्या हत्येच्या क्षणांचे थरकाप उडवणारे फोटो समोर आले आहेत. हे फोटो पाहिल्यानंतर कोणाच्याही हृदयाची धडधड वाढल्याशिवाय राहणार नाही.
सीआयडीने दाखल केलेल्या चार्जशीटमध्ये या धक्कादायक फोटोंचा समावेश करण्यात आला आहे. हत्या घडत असताना त्याचे व्हिडीओ देखील तयार करण्यात आले होते, आणि हे व्हिडीओ आता सीआयडीच्या हाती लागले आहेत. त्याच व्हिडीओमधील स्क्रीनशॉट घेऊन हे फोटो चार्जशीटमध्ये जोडण्यात आले आहेत.
हे फोटो पाहिल्यानंतर हत्येच्या क्रूरतेची जाणीव होते. कुणी दांडक्याने मारताना दिसत आहे, तर कुणी निर्दयपणे मानेवर पाय ठेवलेला आहे. अत्याचार होत असताना कुणी हसत आहे, तर कुणी मोबाईलने व्हिडीओ चित्रीकरण करत आहे. फोटोंमध्ये संतोष देशमुख यांचा चेहरा सुजलेला आणि शरीर रक्ताने माखलेले दिसत आहे. ते जमिनीवर गतप्राण पडले असतानाही त्यांना मारहाण केली जात होती.
या भयानक फोटोंमुळे या हत्येची क्रूरता आणखी ठळकपणे समोर आली आहे, आणि समाजाला हादरवून टाकणारी ही घटना आणखी गंभीर स्वरूप धारण करत आहे.
