सोलापूर: आगामी विधानपरिषद निवडणुकीसाठी भारतीय जनता पक्षाने उमेदवारांची यादी जाहीर केली असून, सोलापूर स्थानिक स्वराज्य संस्था मतदारसंघातून बार्शीचे माजी आमदार राजेंद्र राऊत यांना उमेदवारी देण्यात आली आहे. उमेदवारीसाठी प्रबळ दावेदार मानले जाणारे माजी आमदार प्रशांत परिचारक यांचा पत्ता कट झाला असून, राऊतांचा उमेदवारी अर्ज भरताना त्यांची अनुपस्थिती सध्या संपूर्ण जिल्ह्यात चर्चेचा विषय ठरली आहे.
बातमीचे ठळक मुद्दे:
- भाजपकडून विधानपरिषदेच्या ११ उमेदवारांची यादी जाहीर, सोलापुरातून राजेंद्र राऊतांना संधी.
- उमेदवारीसाठी इच्छुक असलेले माजी आमदार प्रशांत परिचारक यांची अर्ज भरताना दांडी; नाराजीची जिल्ह्यात चर्चा.
- भीमा साखर कारखाना निवडणुकीत देवेंद्र फडणवीसांचा शब्द न पाळल्याचा परिचारकांना फटका.
- खासदार धनंजय महाडिक यांच्या वाढत्या प्रभावामुळे आणि पक्षाच्या भविष्यातील रणनीतीमुळे राऊतांवर पक्षश्रेष्ठींचा विश्वास.
परिचारकांची नाराजी आणि अनुपस्थिती
भाजपने रविवारी रात्री जाहीर केलेल्या ११ जणांच्या यादीत राजेंद्र राऊत यांनी अनेक दिग्गजांवर मात करत बाजी मारली. या जागेसाठी प्रशांत परिचारक अत्यंत इच्छुक होते. विशेष म्हणजे, परिचारक यांनी यापूर्वी विधानसभेच्या दोन निवडणुकांतून पक्षासाठी माघार घेतली होती आणि तत्कालीन पक्षश्रेष्ठींनी त्यांना विधानपरिषदेचा शब्दही दिला होता. त्यामुळे त्यांचे नाव आघाडीवर मानले जात होते. मात्र, ऐनवेळी राऊत यांच्या गळ्यात उमेदवारीची माळ पडली. राऊत यांनी आपला उमेदवारी अर्ज दाखल केला, मात्र या वेळी प्रशांत परिचारक गैरहजर राहिल्याने त्यांची नाराजी प्रकर्षाने समोर आली आहे.
फडणवीसांचा शब्द मोडण्याची मोजावी लागली किंमत
परिचारक यांची निश्चित मानली जाणारी उमेदवारी का नाकारली गेली, यामागे एक मोठे राजकीय कारण असल्याचे बोलले जात आहे. ‘भीमा सहकारी साखर कारखान्याच्या’ निवडणुकीत प्रशांत परिचारक यांनी उपमुख्यमंत्री देवेंद्र फडणवीस यांचा शब्द मानला नव्हता. ही निवडणूक बिनविरोध व्हावी यासाठी खुद्द फडणवीस यांनी मध्यस्थी केली होती. खासदार धनंजय महाडिक यांनी एक पाऊल मागे घेत परिचारक गटाला तब्बल १० जागा देण्याची तयारी दर्शवली होती. मात्र, राजकीय अहंकारामुळे परिचारक यांनी तो प्रस्ताव फेटाळला आणि निवडणूक लागली. पक्षनेतृत्वाचा आदेश न पाळणे आता परिचारक यांना भोवल्याची चर्चा कार्यकर्त्यांमध्ये आहे.
महाडिक गटाचे वर्चस्व आणि पक्षाची आगामी रणनीती
भीमा कारखान्याच्या निवडणुकीत खासदार धनंजय महाडिक यांच्या रणनीतीपुढे परिचारक यांचा निभाव लागला नाही आणि महाडिक गटाने एकतर्फी (One Side) विजय मिळवला. या विजयानंतर विश्वराज महाडिक कारखान्याचे चेअरमन झाले. सोलापुरात महाडिक कुटुंबाने भीमा कारखान्याच्या माध्यमातून स्थानिकांना मोठ्या प्रमाणावर रोजगार दिला आहे.
गेल्या ३ ते ४ वर्षांत खासदार महाडिक यांनी पश्चिम महाराष्ट्रात पक्षसंघटना मोठ्या प्रमाणावर मजबूत केली असून, पक्षपातळीवर त्यांच्या कामाची मोठी छाप आहे. याचीच पोचपावती म्हणून त्यांचे पुत्र कृष्णराज महाडिक यांना महाराष्ट्र प्रदेश युवाध्यक्षपद देऊन पक्षाने मोठी संधी दिली आहे.
खासदार महाडिक यांना विरोध करणे आणि देवेंद्र फडणवीस यांचा शब्द नाकारणे यामुळेच परिचारकांचे नाव शर्यतीतून बाहेर पडले अशी चर्चा सध्या भाजप कार्यकर्त्यांमध्ये रंगली आहे. भविष्यातील राजकीय गणिते आणि जिल्ह्याची बांधणी लक्षात घेऊनच पक्षश्रेष्ठींनी राजेंद्र राऊत यांना विधानपरिषदेच्या रिंगणात उतरवण्याचा निर्णय घेतला आहे.
